കുട്ടികൾക്ക് തിരച്ചറിവുണ്ടാകേണ്ടത്  കുടുംബങ്ങളിൽ നിന്ന് : വിനയൻ

കൊച്ചി‌:  കുട്ടികൾക്ക്  ബന്ധങ്ങളെയും അവയുടെ മൂല്യത്തെ പറ്റിയും  തിരിച്ചറിവുണ്ടാകേണ്ടത് അവരവരുടെ കുടുംബങ്ങളിൽ നിന്നാണെന്ന് സംവിധായകൻ വിനയൻ. കുരുന്നുകളിൽ അറിവിന്റെ ആദ്യാക്ഷരം കുറിക്കേണ്ടത് മാതാപിതാക്കളായിരിക്കണം. പുതുതലമുറയെ ഒരോ ബന്ധങ്ങളുടെയും ദൃഢതയും ആഴവും തിരിച്ചറിഞ്ഞ് വളർത്തിയെടുത്താൽ നല്ലൊരു സമൂഹത്തെ കെട്ടിപ്പടുക്കാനാകുമെന്നും അദ്ദേഹം പറഞ്ഞു. എകെഎസ്ടിയു നേതൃത്വത്തിൽ സംഘടിപ്പിച്ച  സംസ്ഥാനതല അറിവുൽസവത്തിന്റെ സമാപന സമ്മേളനവും സമ്മാനദാനവും ഇടപ്പള്ളി ഗവ.ഹയർസെക്കൻഡറി സ്കൂളിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

വിദ്യാർത്ഥികളിൽ കൂടുതൽ വായനാശീലം വളർത്തിയെടുക്കേണ്ടത് മാതാപിതാക്കളാണ്. തങ്ങളുടെ മക്കളെ അവരുടെ അഭിരുചിക്ക് അനുസരിച്ച് പരിശീലിപ്പിച്ച് മികവുള്ളവരാക്കി മാറ്റണം. ആധുനിക കാലഘട്ടത്തിൽ ബന്ധങ്ങളുടെ കെട്ടുറപ്പുകൾ സമൂഹം മറന്ന് പോയിക്കൊണ്ടിരിക്കുകയാണ്. അവരെ സ്നേഹിക്കാൻ പഠിപ്പിക്കണം,ആ സ്നേഹം പങ്കുവയ്ക്കലിന്റേതാകണം. അതിന് മുൻ കൈയെടുക്കേണ്ടത് കുടുംബങ്ങളിൽ നിന്നാണ്. ഒരു കുട്ടിയുടെ ആദ്യ പഠന കളരിയാകണം അവന്റെ കുടുംബം. തെറ്റും ശരിയും വിവേചിച്ചറിയാൻ അറിവ് കൂടിയേ തീരൂവെന്നും അദ്ദേഹം കൂട്ടിചേർത്തു.   സമാപന സമ്മേളനത്തിൽ സി ആർ ജോസ് പ്രകാശ് അധ്യക്ഷനായിരുന്നു.  രാവിലെ വിജ്ഞാന പരീക്ഷയുടെ ഉദ്‌ഘാടനം പ്രമുഖ പ്രഭാഷകൻ വി കെ സുരേഷ് ബാബു നിര്വഹിച്ചു. രാജാജി മാത്യൂ തോമസ് മുഖ്യപ്രഭാഷണം നടത്തി.സിപിഐ ജില്ലാ സെക്രട്ടറി എൻ അരുൺ,അസി.സെക്രട്ടറി എം എം ജോർജ്,  കെ ബിനീത്, ആർ ശരത് ചന്ദ്രൻ നായർ, ബിനു പട്ടേരി, ജി മോട്ടിലാൽ, ജി ബാബുരാജ്,   കെ കെ സുധാകരൻ, എ ശങ്കരനാരായണൻ, സിബി  അഗസ്റ്റിൻ , മേരി മാത്യു, ബീന കോമളൻ ,ഷാജി ഇടപ്പള്ളി,  എന്നിവർ  സംസാരിച്ചു. എകെഎസ്ടിയു ജനറൽ സെക്രട്ടറി ഒ കെ ജയകൃഷ്ണൻ സ്വാഗതവും  ജനറൽ കൺവീനർ എൻ സി ഹോച്ചിമിൻ നന്ദിയും പറഞ്ഞു