ആരോഗ്യം

ഉറക്കത്തകരാറുകൾ

     ആയുർവേദ ഗ്രന്ഥമായ അഷ്ടാംഗ ഹൃദയത്തിൽ ഇങ്ങനെ വായിക്കാം. സന്തോഷവും, ദുഃഖവും, പോഷണവും, ക്ഷീണവും, ലൈംഗികമികവും അതൃപ്തിയും, ശരിയായ അറിവും അതു വിനിയോഗിക്കാനുളള വിവേകവും ജീവിതവിജയവും, ദുരിതങ്ങളില്ലാത്ത മരണവും ശരിയായ ഉറക്കശീലങ്ങളെ ആശ്രയിച്ചിരിക്കുന്നു. പതിവായ വ്യായാമം. സമീകൃതമായ ആഹാരം എന്നിവയെപ്പോലെ മതിയായ ഉറക്കവും ശരീരത്തിന്റെയും മനസ്സിന്റെയും ആരോഗ്യ സംരക്ഷണത്തിന് അനുപേക്ഷണീയമാണ്. പ്രായം, ജോലി, സാഹചര്യങ്ങൾ, കാലാവസ്ഥ എന്നിവയ്ക്കനുസരിച്ച് ഓരോരുത്തർക്കും ആവശ്യമായ ഉറക്കവും ഉറക്കവുമായി ബന്ധപ്പെട്ട പ്രശ്നങ്ങളും വ്യത്യാസപ്പെട്ടിരിക്കുന്നു .ഉറങ്ങുമ്പോൾ, ശരീരത്തിന് സ്വയം നന്നാക്കാനും ഊർജ്ജം വീണ്ടെടുക്കാനും കഴിയും. ഇത് ശാരീരികവും മാനസികവുമായ ആരോഗ്യത്തിന് അത്യാവശ്യമാണ്. ഉറക്കം ശരിയായി ലഭിച്ചാൽ, രോഗപ്രതിരോധ ശേഷി വർദ്ധിക്കുകയും പലതരം രോഗങ്ങളെ തടയാൻ സഹായിക്കുകയും ചെയ്യും.

ഉറക്കമില്ലായ്മ, പകൽ സമയത്ത് തുടർച്ചയായി ഉറക്കം തൂങ്ങൽ, മുൻകോപം കൂടുക, മറവി സാധാരണമാവുക, ഇൻസോമ്നിയ (നിദ്രാവിഹീനത),നാർകോലെപ്സി( അനിയന്ത്രിതമായ ഉറക്കം), മാനസികപിരിമുറുക്കം, ദഹനക്കുറവും വിശപ്പില്ലായമയും, റസ്റ്റ്ലെസ്സ് ലെഗ് സിൻഡ്രോം( കാലുകൾ ഇളക്കിക്കൊണ്ടേയിരിക്കുന്നപ്രവണത), സ്ലീപ് അപ്നിയ( ഉറക്കത്തിലെ ശ്വാസതടസ്സവും മറ്റും), നിദ്രാടനം ( ഉറക്കത്തിൽ അറിയാതെ എഴുന്നേറ്റ് നടക്കൽ), കുട്ടികളിൽ കാണുന്ന കിടക്കയിൽ മൂത്രമൊഴിക്കൽ, വിഷാദരോഗങ്ങൾ മുതലായ നിരവധി പ്രശ്നങ്ങൾ ഉറക്കവുമായി ബന്ധപ്പെട്ടവയാണ്.

പഞ്ചകർമ്മ ചികിത്സകൾ ഉൾപ്പെടെയുളള ആയുർവേദചികിത്സകൾ ശരീരത്തിലെ ദോഷങ്ങളെ ശുദ്ധീകരിക്കാനും സന്തുലിതമാക്കാനും സഹായിക്കുന്നു. ഇതിൽ ശിരോധാര, നസ്യം, വിരേചനം തുടങ്ങിയ ചികിത്സാ രീതികൾ ഉറക്കമില്ലായ്മ മാറ്റാൻ സഹായിക്കും. അശ്വഗന്ധ, ബ്രഹ്മി, ജടാമാംസി തുടങ്ങിയ നിരവധിഔഷധസസ്യങ്ങൾ ഉറക്കം മെച്ചപ്പെടുത്താൻ സഹായിക്കുന്നു. ഇവ ശരീരത്തെ ശാന്തമാക്കുകയും ഉറക്കം പ്രോത്സാഹിപ്പിക്കുകയും ചെയ്യുന്നു. ചിട്ടയായ ഉറക്കസമയം, വ്യായാമം, ധ്യാനം, യോഗ എന്നിവ ഉറക്കം മെച്ചപ്പെടുത്താൻ സഹായിക്കുന്ന ജീവിതശൈലി ക്രമീകരണങ്ങളാണ്. കൂടാതെ, ഉറങ്ങുന്നതിന് മുമ്പ് ലഘുവായ ഭക്ഷണം കഴിക്കുന്നതും കഫീൻ പാനീയങ്ങൾ, മദ്യം എന്നിവ ഒഴിവാക്കുന്നതും നല്ലതാണ്. ക്ഷീരബല, ബ്രഹ്മി തുടങ്ങിയ ഔഷധ എണ്ണകൾ തലയിലും ശരീരത്തിലും പുരട്ടുന്നത് ഉറക്കം മെച്ചപ്പെടുത്താൻ സഹായിക്കും. ഉറങ്ങുന്നതിന് മുമ്പ് ലഘുവായ ഭക്ഷണം കഴിക്കുന്നതും ചൂടുള്ള പാൽ കുടിക്കുന്നതും ഉറക്കത്തെ സഹായിക്കും. മഞ്ഞളും ജാതിക്കയും ചേർത്ത പാൽ കുടിക്കുന്നത് നല്ല ഉറക്കം കിട്ടാൻ സഹായിക്കുന്നതാണ്. ആയുർവേദ ചികിത്സകൾ ആരംഭിക്കുന്നതിന് മുമ്പ്, ഒരു ആയുർവേദ ഡോക്ടറെ സമീപിക്കേണ്ടത് അത്യാവശ്യമാണ്.നിങ്ങളുടെ ശരീരപ്രകൃതിക്കും ആരോഗ്യസ്ഥിതിക്കും അനുയോജ്യമായ ചികിത്സാരീതികൾ തിരഞ്ഞെടുക്കാൻ ഡോക്ടർക്ക് നിങ്ങളെ സഹായിക്കാനാകും. അതിനാൽ, ഡോക്ടറുടെ നിർദ്ദേശപ്രകാരം മാത്രം ഔഷധങ്ങൾ ഉപയോഗിക്കുക.

Dr. കെ.എ. രവി നാരായണൻ BAMS, PG Dip in Journalism